6 muyeres na Lliteratura Asturiana
Na llarga hestoria de les Lletres Asturianes hai delles muyeres que destaquen por distintes cuestiones y que como en tantos ámbitos de la vida, siguen ensin ser tan conocíes. Escoyemos cinco autores pa descubríteles nun percorríu cronolóxicu pela lliteratura escrita n’asturianu
Xosefa Xovellanos, la primer escritora conocida
Xosefa de Xovellanos naz en Xixón el 4 de xunu de 1745. Hermana del Gaspar de Xovellanos, quiciabes por ello apaez tapecida tres la so figura. Ye la primer escritora n’asturianu muyer de la que conocemos el nome.
Magar que pertenecía a la nobleza, supo denunciar nos sos testos les desigualdaes de la época. La so obra circuló en copies hasta qu’en 1839 Xosé Caveda y Nava editó delles pieces na primer antoloxía de la lliteratura asturiana, onde yera la única escritora.
Morrió’l 7 de xunu de 1807, como monxa y tres una vida dura, na que vivió la muerte del so home, Domingo González d’Aragandona y les trés fíes que tuvieron.
Enriqueta González Rubín, la primer novelista
La figura d’esta escritora nacida en 1832 ye quiciabes la menos conocida d’ente les autores qu’escribieron n’asturianu. Nun se conserva nenguna semeya onde podamos vela, pese a que’l so llabor como novelista fixo que l’asturianu seya la única llingua europea que tien por primer novelista a una muyer.
En 1864 asoleyó una novela por entregues, de la qu’entá nun conocemos el testu, y en 1875 dio imprenta al Viaxe del tíu Pacho el Sordu a Uviedo. Esta novela tuvo desapaecida de forma misteriosa ensin copies conocíes, hasta qu’en 2008 apaeció un exemplar nuna biblioteca privada de Llanes.
Esmolecida pola situación de la muyer, la so educación y el papel secundariu d’esta na sociedá, morrió en L’Infiestu en 1877 a los 45 años.
María Xosefa Canellada, escribiendo na posguerra
Nació en L’Infiestu en 1913, y ente esta villa y Torazu (Cabranes) pasó los primeros años de la so vida. Coló dempués pa Madrid, y estudió’l bachilleratu nel institutu de San Isidro, faciendo darréu estudios de filoloxía, nos que destacó y acabó siendo profesora. Figura clave na filoloxía asturiana, col so estudiu sobre la variedá del asturianu de Cabranes y otros llabores centraos na dialectoloxía y la fonética, foi miembru de l’Academia de la Llingua Asturiana dende la so fundación y dempués de la RAE.
La so principal aportación a la lliteratura asturiana ye la obra infantil Montesín, qu’en 1980 convirtióse na primer obra d’importancia escrita n’asturianu y empobinada al públicu infantil. En 1990 asoleyó un novela curtia n’asturianu, Malia, Mariantina y yo. Morrió en Madrid en 1995.
Nené Losada Rico, la gran voz del occidente
Nació en L.luarca en 1921 y conoció de neña al gran poeta asturianista Fernán Coronas. Pertenez a la "Xeneración de la Posguerra" y nun fixo pública la so obra hasta 1992, cuando asoleyó Cantares valdesanos.
Escritora na variedá occidental del asturianu, la so obra ta considerada ente lo meyor de los poetes del sieglu XX ya inclúi obres como Entre apigarzos y El nome de las cousas. Dende l’añu 2004, l’asociación de muyeres Valdés Siglo XXI convoca un certame de poesía col so nome.
Morrió en 2009 tres de munchos homenaxes y reconocencies al so llabor lliterariu, como l’Urugallo de Bronce, la Medaya de Plata del Gobiernu d’Asturies o la reconocencia como fía predilecta de Valdés.
Berta Piñán, l’autora más internacional
Nacida en 1963 en Cañu, Cangues d’Onís, ye profesora. Dende bien moza collabora en delles revistes, ente elles Lletres Asturianes. Tamién participó na creación de la revista Adréi xunto a Xuan Bello y Antón García.
Gallardonada con dellos premios d’importancia y con llibros publicaos que formen parte de lo meyor de la lliteratura asturiana de finales del sieglu XX y entamos del XX, como Un mes o La tierra entero, ye una de les autores más traducíes a otres llingües y más conocida fuera d’Asturies.
Ta considera tamién autora destacada nel ámbitu de la traducción y la lliteratura infantil. Fíxose en dos ocasiones col Premiu María Josefa Canellada de lliteratura infantil y xuvenil.
Raquel F. Menéndez, el futuru[/list]
Nacida en Salas en 1993 ye anguaño una de les voces más destacaes de la lliteratura moza escrita n’asturianu. Participa en recitales y timbes poétiques y ye miembru del conseyu de redacción de la revista Formientu.
La so obra n’asturianu tien, magar la so mocedá, premios d’importancia como’l Nené Losada Rico, II Concursu de microrrellatos improvisaos n’asturianu pa xente mozo: Entaína a escribir o’l XI Concursu de rellatos curtios en llingua asturiana de L’Horru del Carbayedo.
Forma parte d’una xeneración d’escritores mozos, quiciabes la primera, nos que la muyer tien la so presencia normalizada dafechu. Güei la proporción ente home y muyeres avérase cada añu más, y les muyeres na lliteratura asturiana yá nun son la escepción.